Тилвелла некъахо...

Доккхачу дуьненахь парг1ато лоьхуш,
Ойланаш яржийчи, гаттоно къуьйлуш,
Х1ора а тилвелла некъахо хилла,
Мел дезарх, дуьне хьо..
Цхьа а тхох хьан да ца хилла..
Тилвелла некъахо!

Ахь ойэ т1елоцу х1ора а дуьненчу волуш,
Хьо дезадолийтуш д1айоьллу комаьрша не1,
Синкъерам кийдабо, д1алаца - схьаэца бохуш,
Цу маьлхан з1аьнаршца къагабо хьайн х1ора некъ.
Делахь а цалеч1къош, х1оранга мохь туххий олу,
Хьаша бен вац хьуна, х1ай воьдург, хьо суна чохь.
Тилвелла некъахо!

Масане адамаш хьоьшу хьо самукъа долуш,
Дерриге диц а деш, 1ехадо адамийн дог.
1ожале б1аьргта1ош кховдаво «д1аэца» олий,
Масане 1ехавеш дакъаза воккху ахь стаг.
Х1етте а хьоьшу хьо, хиллачух масала доцуш
Я малхах, я баттах ца1ебаш бо бехха некъ.
Тилвелла некъахо!

Хаттаран хьаьрк хилла деттало сан дагах дог1а,
Къоьжачу сайн месех цецваьлла бетта ас б1аьрг.
Жималлехь дахаран некъаш сайн мел деха гора,
Массех бен г1улч яккха цакхуьуш, кхачий и некъ.
Со стенах 1ехийна хилла ахь, х1ай Дуьне олуш,
Айдаран хьаьрк йина, шен 1аса 1уьтту цо хьох.
Тилвелла некъахо!

Мел хаза кхета-кха 1уьйренца и маьлхан з1аьнарш,
Серлонца къагадо 1аламан исбаьхьа куц.
Мел хаза 1ена-кха дог1ана и х1ора т1адам,
Хьогаллех 1абадеш латтанаш, хьайбанаш, буц.
Массо а 1аламан хийцамах самукъадолуш,
Кханене сатуьйсуш, толлу вай дахаран некъ..
Мел дукха ваьхнариг, шен дахар ирсаца огуш,
Дахаран даржехь и хьашанал сов ваьлла вац..
Тилвелла некъахо!